ދިވެހި ރައްޔިތުން ދީނީ ގޮތުން ހޭލުންތެރި ކުރުވާ ދިވެހި މުޖްތަމައުގައި ދީނީ އިލްމު ފެތުރުމުގައި އިލްމުވެރީން ކުރަމުން ގެންދަނީ ބުރަ މަސައްކަތްތަކެކެވެ. ތަޢުރީފު ހައްގު މަސައްކަތްތަކެވެ. ބައެއް އިލްމުވެރީން, އެ ބޭފުޅުންގެ ވަރަށް ގިނަ ވަގުތު ހޭދަ ކުރައްވަނީ ދަޢުވަތު ފެތުރުމުގަ އެވެ. އާންމުންނަށް ނޭންގޭ ކަންކަން އޮޅުންފިިލުވައި ދިނުމުގަ އެވެ. އާންމުން ފޮނުވާ އެކި ސުވާލުތަކަށް ޖަވާބު ދިނުމުގަ އެވެ.

އެފަދަ އެއް ބޭފުޅަކީ އައްޝައިޚް މުހައްމަދު އިބްރާހީމް (ނައިފަރީ) އެވެ. ނައިފަރުގެ މަދްރަސަތުލް އިފްތިތާހްގެ އިސްލާމް މުދައްރިސެއްގެ ވަޒީފާ އަދާކުރައްވަމުން، ދީނީ އެކިއެކި މައުޟޫތަކަށް ފޮތް ލިޔުއްވައި، ދަރުސްތައް ދެއްވައި، އެއްވެސް ވަރުބަލިކަމެއްނެތި، ދީނީ އެކިއެކި ކަންކަމާއި ގުޅިގެން އާއްމުންނަށް އޮޅުން ނުފިލައި ހުރި ކަންކަން ފިލުވައިދޭ، އެފަރާތްތަކުގެ ސުވާލުތަކަށް ޖަވާބުދެއްވުމުގައި ރެއާއި ދުވާލު ހޭދަކުރައްވަމުން ގެންދެވިއެވެ.

ދީނީ ގޮތުން ދިވެހިން ހޭލުންތެރިކުރުމަށްޓަކައި ޝެއިޚް ދެއްވާފައިވާ ދަރުސްތަކުގެ ތެރެއިން އެންމެ ފާހަގަކޮށްލަންޖެހެނީ ތަޢުހީދާއި ގުޅިގެން ދީފައިވާ ދެއްވާފައިވާ ދަރުސްތަކެވެ. އެ މަޢުޟޫއަށް އެތަކެއް ދަރުސްތަކެއް ދެއްވާފައިވާއިރު އެ ދަރުސްތަކުން އެތައް ބަޔަކަށް ފައިދާ ކޮށްފައިވާނެ އަދި މިހާރުވެސް ކުރަމުންދާ ކަމީ ޝައްކެތް ވެސް އޮތް ކަމެއްނޫނެވެ.

ދަރުސް ތަކުގެ އިތުރުން ޝެއިޚް ވަނީ ދިވެހިބަހުން އެތަކެއް ފޮތްތަކެއް ލިޔުއްވައި އަރަބި ފޮތްތައް ތަރުޖަމާ ކުރައްވާފައިވެއެވެ. އެގޮތުން ފާހަގަކޮށްލެވޭ ފޮތްތަކުގެ ތެރޭގައި ޙިސްނުލް މުސްލިމް، ކިތާބުއް ޞިޔާމު، ނަބީބޭކަލުންގެ ތަރިކަ، ތައުޙީދުގެ ޚުލަސާ، ކިތާބުއް ޞަލާތު ފަދަ މުހިންމު އެތަކެއް ފޮތެއް ހިމެނެއެވެ.

ދީނީ ދަޢުވަތުގައި އެފަދަ ހީވާގި ކަމާއިއެކު އުޅުއްވަމުން ގެންދަވަނިކޮށް، ޝެއިޚްގެ ލޮލަށް ސިއްހީ މައްސަލަތަކެއް ދިމާވެ ލޮލުގެ ފެނުން ދައްވާން ފެށިއެވެ. އެކަމަށް ފަރުވާ ކުރެއްވުމަށް 2019 އަދި 2021 ގައިވެސް ލޮލޮގެ ސާޖަރީއެއް ހެއްދެވިއެވެ. އެއިންވެސް ލޮލަށް އެދެވޭ ފަރުވާއެއް ނުލިބި ޝެއިޚްގެ ލޮލުގެ ފެނުން ގެއްލުނެވެ.

އޭގެ ގާތްގަނޑަކަށް ދެ އަހަރުފަހުން 2023 ވަނަ އަހަރު ޝެއިޚްގެ ހާލު ދެރަވެގެން ޅ.އަތޮޅު ހޮސްޕިޓަލުގައި ފަރުވާދޭންޖެހުނެވެ. އެއަށްފަހު އިތުރު ފަރުވާއަށް މާލެ ފޮނުވާލައި އައިޖީއެމްއެޗްގައި ވެސް ވަނީ ފަރުވާ ދީފައެވެ. އެފަހުން ޝެއިޚްގެ ސިކުނޑީގައި ޓިޔުމަރެއް ހުރިކަން އެނގި އެ ޓިޔުމަރު ނެގުމަށް އޮޕަރޭޝަން ކުރަންޖެހޭތީ އޭޑީކޭ ހޮސްޕިޓަލަށް ބަދަލުކޮށް، އޭޑީކޭގެ ނިއުރޯ ސާޖަންގެ ގޮތުގައި އޭރު މަސައްކަތް ކުރެއްވި ޑރ. ޢަލީ ނިޔާފްގެ ޓީމުން ޝެއިޚްގެ ސިކުނޑީގެ އޮޕަރޭޝަންވެސް ކުރިއެވެ. 50/50 ގެ އެ އޮޕަރޭޝަން ކާމިޔާބުވެ ޝެއިޚްގެ ބަލިޙާލަތަށް ކުޑަ ލުޔެއް ލިބިގެންދިޔައެވެ.

އެހެންނަމަވެސް ލޮލުގެ ފެނުން ގެއްލި، ދިމާވި ސިއްހީ މައްސަލަތަކާހުރެ، ގާތްގަނޑަކަށް 17 އަހަރުވަންދެން ޝެއިޚް އަދާކުރައްވަމުންދިޔަ ވަޒީފާ ގެއްލި، އާމްދަނީ ލިބެމުންދިޔަ އެ މަގު ބަންދުވިއެވެ.

މިހާރު ޝެއިޚްއަށް ލިބިލައްވަނީ އެންސްޕާއިން ނުކުޅެދޭ މީހުންނަށްދޭ އެލަވަންސް އެކަންޏެވެ. ޝެއިޚް ޚަރަދު ކުރައްވަންޖެހޭ ދަރިއެއް ހުރިއިރު ބޭސްފަރުވާއަށް ޚަރަދު ކުރައްވަމުން އެކަން ކުރައްވަން ނުހަނު ދަތިތަކާ ކުރިމަތިލައްވަންޖެހެއެވެ. މިޙާލަތުގައި ޝެއިޚަށް އެހީތެރިވަމުންދަނީ ޢާއިލާގެ ފަރާތުންނާއި ހެޔޮއެދޭ ބައެއް ފަރާތްތަކުންނެވެ.

މިފަދަ ޙާލުގައިވެސް ޝެއިޚްގެ ދީނީ ދަޢުވަތު ދެއްވުމުގެ މަސައްކަތަށް ބަދަލެއް ނާދެއެވެ. ލޯފަން ހާލުގައިވެސް ދީނީ ދައުވަތު ދެވުމުގައި ދެގޮތެއްނުވެ ހުންނެވިއެވެ. 

އެގޮތުން ރަށުގައި ހުންނަވާނަމަ ކޮންމެ ހަފްތާއަކު އެންމެނަށް ބައިވެރިވެވޭނެ ހެން ކުރިއަށް ގެންދާ "މަގޭ ސުވަލަކީ" ޕްރަގްރާމްގައި ބައިވެރިވެވަޑައިގަންނަވައެވެ. ދީނީ އެކި މައުލޫމާތުތައް ހިއްސާކޮށް އާންމުންގެ ސުވާލުތަކަށް ޖަވާބު ދެއްވައެވެ.

ހަމައެހެންމެ އާއްމުންގެ މެދުގައި ދީނީ ހޭލުންތެރިކަން އިތުރުކުރުމަށް ދަރުސްތައް ދެއްވައެވެ. އެފަދަ ދަރުސްތައް ދެއްވަނީ ޝައިޚްގެ ދަރިވަރެއް ގެންގޮސް އޭނާ ލައްވާ ޝެއިޚަށް ފޮތް ކިޔާދީ، އެ އަޑުއެހި ބައިތައް ހިތަށް ނަގައިގެންނެވެ. އެތަކެއް ދަތިތަކާއެކުވެސް ހިތްވަރު ކޮށްގެން އެ މަސައްކަތް ދޫކޮށް ނުލައްވައެވެ.

ދީނީ ދަޢުވަތުގައި މިފަދަ ބުރަ މަސައްކަތް ކުރައްވަމުންދާ، އަދި ކޮށްދެއްވާފައިވާ ޝެއިޚް މިހާރުވެސް އަންނަނީ ސިއްޙީ އެކިއެކި ކަންކަމަށް ފަރުވާކުރައްވަމުންނެވެ. އެގޮތުން ހިތުގެ މައްސަލަ އާއި ހަކުރު މައްޗަށް ދިޔުމުގެ މައްސަލަ ހިމެނެއެވެ. އަދި 2023 ވަނަ އަހަރު ސިކުނޑީގެ ޓިޔުމަރު ނަގަން ކުރި އޮޕަރޭޝަނުގައި ޓިޔުމަރުގެ 75 އިންސައްތަ ނެގި އިރު، އަނެއް 25 އިންސައްތައިގެ ހާލަތު ބެލުމަށް ހަދަންޖެހިފައިވާ އެމްއާރުއައި ސްކޭން އަދިވެސް ނުހެދެއެވެ. ދޭތެއަކުން ކިޑްނީގެ މައްސަލަވެސް ކުރިމަތިވެއެވެ.

އެ ހުރިހާ ކަމަކަށް ފަރުވާ ކުރައްވަން މާލެ ދަތުރުކުރަން ޖެހޭއިރު، ލޮލުގެ ފެނުން ގެއްލިފައި ވުމުން އަބަދުވެސް އެކުގައި މީހަކު ގެންދަން ޖެހެއެވެ. އެއިން ކޮންމެ ކަމަކީވެސް އެތަކެއް ޚަރަދަކާއި ތަކުލީފެއް އުފުލަންޖެހޭ ކަންކަމެވެ. އެކަންކަމަށް ޝެއިޚް ކެތްކުރައްވަމުންދަނީ އެއްވެސް ޝަކުވާއެއް ނެތިއެވެ.

އެ ކެތްތެރި ޚިދުމަތްތެރި ޝެއިޚް ކޮށްދެއްވާފައިވާ ޚިދުމަތްތަކުގެ އަގުވަޒަންކޮށް، ޝެއިޚްގެ ދީނީ ދަޢުވަތު ދިނުމުގެ މަސައްކަތުގައި ދިމާވާ ދަތިތަކަށް ކުޑަވެސް ލުޔެއް ހޯދައިދެވެން އޮތީ ޝެއިޚްއަށް ދިވެހިންގެ ފަރާތުން އެހީ ލިބިގެންނެވެ. އެދުވަހު އަދި އަދުވެސް އަމިއްލަ ނަފްސަށްވުރެ ދީން އިސްކުރައްވައި، ދިވެހިން ދީނުގެ މަގުގައި ސާބިތުވެ ތިއްބެވުމަށް އެހީވެދެއްވި ޝެއިޚް މިވަގުތު ވަނީ ދިވެހިންގެ އެހީއަށް އިންތިހާއަށް ބޭނުންވެފައެވެ.