ކަނޑުހުޅުދޫ/ ހަނދުވަރުދޭގޭ، މައުސޫމް ހަސަންގެ ދޮށި ދަރިފުޅު އަދި ދެމަފިރިންގެ ހުރި ހަމައެކަނި ފިރިހެން ދަރިފުޅު މަފާޒުގެ ލޮލުގައި އަޅާ ވޭނާއި އެދަރިފުޅަށްވާ ތަދު ފެނި އެ މައިންބަފައިންގެ ހިތުގައި އަޅަނީ ވޭނާއި ކެކުޅުން އަންދާޒާ ކޮށްލުން ވާނީ ދަތި ކަމަކަށެވެ.

އުމުރުން އެއް އަހަރު ނުވަނީސް ލޮލުގެ މައްސަލަ ފާހަގަކުރެވި، ޑރ. ފާތިމަތު ދީދީއަށް ދެއްކުމުން ބުނެފައިވަނީ އެލަރޖީއެއް ކަމަށެވެ. އައިކެއާއަށާއި، އައިޖިއެމްއެޗްގެ ލޮލުގެ ޑޮކްޓަރުންނަށް ދެއްކުމުންވެސް ދީފައިވަނީ ހަމަ އެއް ޖަވާބެކެވެ. ނަމަވެސް، ދަރިފުޅުގެ ލޮލުގެ ހާލަތު ދުވަހެއް ދުވަހަކަށް ދިޔައީ ދަށްވަމުންނެވެ.

ދަރިފުޅުގެ ލޮލަށް ފަރުވާއެއް ހޯދުމަށް، އުމުރުން 3 އަހަރުގައި، އޭޑީކޭގެ ޑރ.ވިރާޖްއަށްވެސް ވަނީ ދައްކާފައެވެ. އޭނާއަށް ދެއްކުމުން ބުނެފައިވަނީ ރާއްޖެއިން ބޭރަށް ގޮސް ޑޮކްޓަރަށް ދައްކަން ޖެހޭނެ ކަމަށެވެ. އެހެންކަމުން، ދަރިފުޅު ގޮވައިގެން އންޑިޔާއަށް ގޮސް، ޗައިތޭނިއާ ހޮސްޕިޓަލް، އަގަރުވާލާ ހޮސްޕިޓަލް، އަރުވިންދާ ހޮސްޕިޓަލް އަދި ޕްރައިސް ހޮސްޕިޓަލަށް ގޮސް ފަރުވާ ހޯދާތާ 9 އަހަރު ވެއްޖެއެވެ.

އަރުވިންދާ ހޮސްޕިޓަލް އަދި ޗައިތޭނިޔާ ހޮސްޕިޓަލުން ޖުމްލަ 17 ސަރޖަރީވެސް ހެދިފައިވެއެވެ. އަގުރުވާލާ ހޮސްޕިޓަލުން ބުނެފައިވަނީ ދެވޭނެ އިތުރު ފަރުވާއެއް ނެތް ކަމަށެވެ.

ސަރޖަރީތަކަށްފަހުވެސް ދަރިފުޅުގެ ލޮލުގެ ފެނުމަށް އަދި ތަހައްމަލްކުރަމުންދާ ވޭނަށް ލުޔެއް ލިބޭ ގޮތް ވަނީ ނުވެފައެވެ. ސްކޫލަށްވެސް ނުދެވެއެވެ. އެއް އުމުރުފުރައިގެ  ކުދިންނާ އެއްވަރަށް ދަރިފުޅު ބޮޑެއްވެސް ނުވެއެވެ. ޑޮކްޓަރުން ބުނާ ގޮތުގައި ދަރިފުޅުގެ  އުޅުމަށް އައިސްފައިވާ ބަދަލުތަކަކީ އެހާ ގިނަ ސަރޖަރީތައް ހެދުމުގެ ސަބަބުން އައިސްފައިވާ ބަދަލުތަކެކެވެ.

އެފަދަ ހިތްދަތި ކަމާއެކު ދުވަސްތައް ވޭތުކުރަމުން ދަނިކޮށް ރައްޓެއްސެއްގެ ފަރާތުން ބެންކޮކްގެ ބަބްރަމްގުރާންޑް ހޮސްޕިޓަލްގެ މަޢުލޫމާތު ލިބުނެވެ. އަދި އެތަނުން ދަރިފުޅަށް ފަރުވާއެއް ލިބިދާނެ ކަމުގެ އުއްމީދުގައި ސެޕްޓެމްބަރު މަހުގެ 14 ވަނަ ދުވަހު ބެންކޮކްއަށް ގޮސް ދަރިފުޅު ޑޮކްޓަރަށް ދައްކާފައިވެއެވެ.

ޑޮކްޓަރު ބުނެފައިވާ ގޮތުގައި ޖުމްލަ 8 ޑޯޒަކަށް ބަހާލައިގެން ދަރިފުޅުގެ ލޮލަށް ފަރުވާ ކުރަން ޖެހެއެވެ. އެގޮތުން، ސެޕްޓެމްބަރު މަހުގެ ފަރުވާއަށްފަހު ދަރިފުޅުގެ ލޮލުގެ ފެނުމަށް ރަނގަޅު ބަދަލެއް ވަނީ އައިސްފައެވެ. 3 ދުވަހު ސްކޫލަށްވެސް ދެވުނެވެ.

އެފަހުން ދަރިފުޅަށް އިތުރު ޑޯޒްތައް ދިނުމަށް ބެންކޮކްއަށް ދިޔުމުން އަދި އިތުރު 10 ޑޯޒް ދޭން ޖެހޭނެ ކަމަށް ޑރ ބުނެފައިވެއެވެ. މީގެ ސސަބަބަކީ އިންޑިއާއިން ކޮށްފައިހުރީ ނުބައި އޮޕަރޭޝަންތަކެއް ކަމުން، އިތުރު އޮޕަރޭޝަނެއް ކޮށްފި ނަމަ ދަރިފުޅަށް ނޭދެވޭ އަސަރު ކޮށްފާނެ ކަމުގެ ބިރު އޮތުމެވެ.

އެހެންކަމުން، މަފާޒުގެ އާއިލާއިން ވަނީ ފަންޑް ރެއިޒް ކޮށްގެންނާއި، ލޯނު ނަގައިގެން އަދި ހެޔޮ އެދޭ ފަރާތްތަކުގެ އެހީގައި ފައިސާ ހޯދައިގެން ބެންކޮކަށް ގޮސް އެ ދިހަ ޑޯޒް ވަނީ ހަމަކޮށްފައެވެ.

އެފަހުން ޑޮކްޓަރަށް ދެއްކުމުން ބޭސް ބަދަލުކޮށް ޓެސްޓު ތަކެއް ހަދާފައިވާއިރު، އިތުރު ސަރޖަރީއެއް ހެދުމަށް ޑޮކްޓަރު ވަނީ ލަފާދީފައެވެ. އެ ސަރޖަރީ ހެދުމަށް މަފާޒުއާއި އޭނާގެ މަންމަ އާއި ބައްޕަ ބެންކޮކަށް ގޮސް 12 ދުވަހު ހުންނަންޖެހެއެވެ. އެ 12 ދުވަހުގެ ކެއުމާއި، ހުރުމާއި، ސަރޖަރީގެ އިތުރުން ޓިކެޓުގެ ޚަރަދަށް ގާތްގަނޑަކަށް 230،813.49 (ދެ ލައްކަ ތިރީސް ހާސް އަތް ސަތޭކަ ތޭރަ ރުފިޔާ ސާޅީސް ނުވަ ލާރި) އަރާނެ ކަމަށް ލަފާކުރެވެއެވެ.

ލޮލުގެ ކޮއި ފަދަ ދަރިފުޅުގެ ލޮލުގެ ފަރުވާއަށް މިފަދަ ބޮޑު ޚަރަދެއް ކުރަން ޖެހިފައިވާއިރު، މި އާއިލާގެ އެހެން އާންމު ހާލަތުވެސް ދަންނަވާލަން ޖެހެއެވެ. "އެއްކުއްޖެއްގެ އުމުރުން 17 އަހަރެވެ." އެންމެ ހަގު ދަރިފުޅަށް އަދި މި 7 އަހަރެވެ. ތިން ކުދިންނާއި މުޅި އާއިލާގެ ކެއިންބުއިމާއި އެ ނޫންވެސް ޒަރޫރީ ބޭނުންތައް ފުއްދުމަށް އެތަކެއް ޚަރަދުތަކެއް ހޭދަވާއިރު، އާމްދަނީ ހޯދުމަށް މަސައްކަތް ކުރާ ހުރި ހަމަ އެކަނި އެންމެ މީހެކެވެ. ކުދިންގެ ބައްޕަ މައުސޫމެވެ.

މައުސޫމުގެ މުސާރައަކީ 15،000 ރުފިޔާ އެވެ. ނަމަވެސް ދަރިފުޅު ބަލިވެގެން ގިނަ ދުވަސްތަކެއް ރާއްޖެއިން ބޭރުގައި ހޭދަކުރަން ޖެހުމުން 2023 ވަނަ އަހަރު މުސާރަ ހަމައަށް ލިބުނީ އެންމެ މަހެއްގައެވެ. އެއްބައި މަސްމަހުގައި 13،000 ލިބުނުއިރު 12،000 ލިބުނު މަސްމަސްވެސް ދިޔައެވެ. އެއްމަހުގައި 11،000 ވެސް ލިބުނެވެ. އެލިބޭ މަދު މުސާރައިން އެތައް ޚަރަދެއް ކުރަން ޖެހެއެވެ.

ދަރިފުޅުގެ ބަލި ހާލަތު ހުރި ގޮތުން އާއިލާ އެކުގައި، ދިރިއުޅެމުންދަނީ މާލޭގެ ދެ ކޮޓަރި އެޕާޓްމަންޓެއްގެ ތެރެއިން އެއް ކޮޓަރި ކުއްޔަށް ހިފައިގެންނެވެ. އެތަނުގެ ކުލީގެ ގޮތުގައި އެކަނިވެސް އަތުން، 10،000ރ ހޭދަކުރަންޖެހޭއިރު، ފެން ބިލަށް 1533ރ ކަރަންޓްބިލަށް ގާތްގަނޑަކަށް 666 ރުފިޔާ ކޮންމެ މަހަކު ހޭދަކުރަންޖެހެއެވެ. މުޅި އާއިލާގެ ޒަރޫރީ އެހެނިހެން ބޭނުންތައް ހިމަނައިގެން މަހެއްގެ މައްޗަށް 26،500ރ އަށްވުރެ ގިނައިން ޚަރަދު ކުރަން ޖެހެއެވެ.

ކަންމިހެން ހުރުމުން ހެޔޮހިތުން ހޮޔޮ އެދޭ ފަރާތްތަކުގެ ދީލަތި އެހީ ލިބިގެން މެނުވީ މަފާޒުގެ ލޮލަށް ފަރުވާ ކުރާނެ ފައިސާ ހޯދުމަކީ ވާނެ ކަމެއް ނޫނެވެ. އެހެންކަމުން، ޢާއިލާއިން އަނެއްކާވެސް ވަނީ އެކި ތަންތަނުގައި އެހީއަށް އެދިގެން ކޮންމެވެސް ވަރަކަށް ފައިސާ ހޯދާފައެވެ." އެގޮތުން، މިހާތަނަށް ލިބިފައިވަނީ، 68،848 ރުފިޔާއެވެ. އާސަންދަ، އެންސްޕާ އަދި ޒަކާތު ފަންޑުންވެސް އެއްވެސް އެހީއެއް ލިބިފައެއް ނުވެއެވެ. އެހެންކަމުން، ފަރުވާއަށް އަދިވެސް 161،965 ރުފިޔާ ބޭނުންވާއިރު، މަފާޒުގެ މިވަގުތު، ވަނީ ހެޔޮ އެދޭ ފަރާތްތަކުގެ ދީލަތި އެހީއަށް ނުހަނު ބޭނުންޖެހިފައެވެ.